Animation

D Compiuteranimazioon vom ene Würfel, wo sich dräit

Animazioon (vo lat. animare, „zum Lääbe erwecke“; animus, „Gäist, Seel“) isch im ängere Sinn jedi Technik, wo mä Äinzelbilder in schnäller Folg eme Zueschauer zäigt, so dass dä e bewegts Bild gseet. D Äinzelbilder chönne zäichnet, vom e Compiuter berächnet oder fotografischi Ufnaame si. Wenn e sonigi Sekwänz mit 24 Bilder oder mee bro Sekunde vorgfüert wird, entstoot bim Zueschauer d Illusion von ere flüssige Beweegig. E 90 Minute lange Film bestoot us öbbe 129'600 Äinzelbilder und dr Ufwand für zum son e Film mache isch hooch.

D Animazioon analüsiert d Beweegige, wo mä in dr Natur findet, setzt si aber nit nume 1:1 in dr Sünthese um, sondern mä cha si au verzerre oder mit eme veränderte Täiming umzsetze und bechunnt eso dramatischi oder komischi Effekt.

Dr grösst Däil vo dr Animazioon wird für e Drickfilmberiich broduziert, für s Kino oder s Färnsee, zur Underhaltig oder für d Wärbig. Es git aber au die bewegti Wisualisierig in dr Naturwüsseschaft, dr Archidektur, im Disäin oder dr Leer.